தமிழ் முரசு - கல்வி, கலை, விளையாட்டில் சிறந்த மாணவர்களுக்கு உன்னத விருதுகள்

கல்வி, கலை, விளையாட்டில் சிறந்த மாணவர்களுக்கு உன்னத விருதுகள்
சிங்கப்பூரின் உயரிய அதிபர் விருது பெற்ற ஜோஷுவா ரெனி ஜெயராஜ்(19) சிண்டாவின் கல்விக்கான உன்னத விருதுகள் பெற்றவர்களில் ஒருவர்.

ஆங்கிலோ சீனப் பள்ளியைச் (இன்டிபென்டெட்) சேர்ந்த ஜோஷுவா, அதிபர் விருது பெற்ற முதல் ‘இன்டர்னேஷனல் பக்கலரெட்’ எனும் அனைத்துலகக் கல்வித்திட்டம் பயின்ற மாணவர் ஆவார்.

தற்போது லண்டன் பல்கலைக் கழகத்தில் சட்டத்துறை பயின்று வரும் ஜோஷுவா தமது பள்ளிப் பருவத்தில் ரக்பி விளையாட்டிலும் சிறந்து விளங்கினார்.

தம்மால் முடிந்த அளவு சமூகத்திற்கும் தொண்டாற்றுவது முக்கியம் என்று கருதும் ஜோஷுவா தமது பட்டபப்டிப்பை மேற்கொள்ள சென்ற வாரம் லண்டன் சென்றுவிட்டதால் அவருக்கு பதில் அவரது பெற்றோர் சிண்டா எனப்படும் சிங்கப்பூர் இந்தியர் மேம்பாட்டுக் கழகம் வழங்கிய கல்விக்கான உன்னத விருதினைப் பெற்றுக் கொண்டனர்.

“வாழ்க்கை ஒரு ஓட்டப் பந்தயம் போல. எப்படி முடிக்கிறோம், எப்போது முடிக்கிறோம் என்பது முக்கியமல்ல, கிழே விழுந்து அடிபட்டாலும், மீண்டு எழுந்து முடிவு எல்லையை அடைவதே முக்கியம்,’’ என்று முன்னதாகப் பதிவு செய்யப்பட்ட வீடியோ நேர்காணலில் ஜோஷுவா கூறினார்.

அந்த வீடியோ நேற்று நன்யாங் பலதுறைக் கல்லூரியில் நடைபெற்ற சிண்டாவின் உன்னத விருதுகள் வழங்கும் விழாவில் ஒளிபரப்பப்பட்டது.

இது போன்ற விருதுகள் தங்கள் வெற்றிக்கும் சாதனைக்கும் சமூகம் தரும் அங்கீகாரம் என்று கருதுகிறார் கல்விக்கான உன்னத விருது பெற்ற திரு மெல்வின் தினேஷ் ராஜ், 25.

சிங்கப்பூர் நிர்வாகப் பல்கலைக் கழகத்தில் நிதி, பொருளியல் துறையின் சிறப்பு இளங்கலைப் பட்டம் பெற்ற ராஜ் தற்போது ‘சிட்டி பேங்’ வங்கியில் பணி புரிந்து வருகிறார்.

விளையாட்டுக்காக மட்டும் கிட்டத்தட்ட 100 மாணவர்கள் சிண்டாவின் உன்னத விருதுகள் பெற்றனர்.

அவர்களுள் அண்மையில் சிங்கப்பூரில் நடைபெற்ற இளையர் ஒலிம்பிக் போட்டியில் காற்பந்தில் வெண்கலப் பதக்கம் பெற்ற துகிலன் ஜீவமணியும்,15, ஒருவர்.

தற்போது பொங்கோல் உயர் நிலைப் பள்ளியில் உயர் நிலை மூன்றில் பயின்று வரும் துகிலனுக்குக் கிடைத்திருக்கும் முதல் சிண்டா உன்னத விருது இது.

தமது முதல் காதல் காற்பந்து என்ற போதிலும் விமானத் துறையில் கல்வியை மேற்கொண்டு விமான¬ ஆகவேண்டும் என்ற ஆசையும் துகிலனுக்கு உண்டு.

இளையர் ஒலிம்பிக்கில் பங்கேற்ற சேக்கரி ரையன், ரஞ்சிதா ராஜா போன்ற இளையர்களுக்கும் விருது வழங்கிச் சிறப்பிக்கப்பட்டது.

சிண்டாவின் உன்னத விருது வழங்கும் விழாவில் சிறப்பு விருந்தினராகப் பிரதமர் அலுவலக அமைச்சர் லிம் சுவீ சே வருகை தந்தார்.

மூத்த அமைச்சர் பேராசிரியர் எஸ். ஜயகுமார், நிதி அமைச்சர் தர்மன் சண்முகரத்னம் ஆகியோரும் நேற்றைய உன்னத விருது வழங்கும் நிகழ்ச்சியில் கலந்துகொண்டனர்.